ಮದುವೆ ಮನೆ

ಕರೆದಿಹುದೆನ್ನ ಸಹ್ಯಾದ್ರಿಯ ಮಡಿಲಿಗೆ ನೇತ್ರಾವತಿಯ ತುಡಿತ

ಸಂಸೆಯಲಿ ಕಾಲಿಟ್ಟಾಗ ಮತ್ತೆ ಮತ್ತೆ ಪನ್ನೀರಿನ ಸ್ವಾಗತ

ಮೈಯೆಲ್ಲಾ ತಂಪಾಗಿಸುವ ಹವೆ ಸುತ್ತಲೂ
ಮದುವೆ ಮನೆಯ ವಾತಾವರಣ ನಿರ್ಮಿಸಿದ ಹೂಗಳು

ಮಾಡಿತ್ತು ಹಕ್ಕಿಗಳ ಕಲರವ ಓಡಾಡುತ್ತಾ
ಗೌಜಿ ಹಬ್ಬಿಸಿದಂತೆ ಪುಟ್ಟ ಮಕ್ಕಳು

ಅಡುಗೆ ಮನೆಯ ರಾಡಿಗೆ ಗಲೀಜಾದ ಕಾಲನ್ನು
ತೊಳೆಯಲು ಕಾಯುತ್ತಿರುವ ತಂಪು ನೀರಿನ ತೊರೆಗಳು

ಬರೆದಿತ್ತಲ್ಲಿ ಒಂದೆಡೆ ಹರಿಯುವ ನದಿಯ ಬಳಿ
ಕುಡಿಯುವ ನೀರು ಗಲೀಜು ಮಾಡಬೇಡಿ

ಊಟದ ಸಮಯಕ್ಕೆ ನುಗ್ಗುವ ಮೋಡಗಳ ತಡೆದು
ಹಿಂದಿನ ಪಂಕ್ತಿ ಇನ್ನೂ ಮುಗಿದಿಲ್ಲ ಎನ್ನುವ ಶಿಖರಗಳು

ನೇತ್ರಾವತಿ ಬೆಟ್ಟದ ತುದಿಯನ್ನೇರಿ ನಿಂತ ಸಾಹಸ
ಮದುವೆ ಮಂಟಪವೇರಿ ವಧುವರರ ಕೈ ಕುಲುಕಿದ ಸಂತಸ